PRESS NOTE
COVID-19 hri leng vanga inkhuahkhirhna kalpui mekah Lengpui Airport kaltlanga khualzin rawn lut te fimkhur zawka ILP pekchhuah an nih theih nan mCOVID-19 mobile application leh website www.mcovid19.mizoram.gov.in a registration tihna mPASS Flight chu tlemin a siam danglam hret a.
Thlawhna a rawn lut tur reng reng te chuan he application emaw, website ah emaw hian lut in mPASS Flight ah an in register tur a ni. ILP inkaihhruaina hman mekin Mizoram khua leh tui dik taka a chhiar ni lo leh ILP mamawh lo zinga a chhiar tel ni lo khualzin te mPASS Flight chu Temporary ILP ah rin nghal theihin ruahmanna siam a ni. Heng khualzin te mPASS Flight ah hian ‘Temporary ILP’ tih a inziak tel tawh ang. Lengpui Aiport ah Temporary ILP fee bituk ang an thehluh hnuah a hrana Temporary ILP lak a ngai tawh lo ang.
mPASS Flight ah hian Health & Family Welfare Department in khualzin lo lut te atanga hriattur pawimawh te dah tel vek a nih tawh avangin khualzin lo lut tur ten mPASS Flight hi an fill up ngei ngei a ngai a ni.
He ruahmanna thar hi www.mcovid19.mizoram.gov.in website ah chuan hman theih nghal a ni a, mCOVID-19 mobile application hmang tu te tan erawh and mobile application update phawt a ngai ang.
Temporary ILP hi khualzin te Quarantine facility atanga an chhuah atanga ni 7 chhung emaw; khualzin COVID positive te Covid Care Centre atanga an chhuah atanga ni 7 chhung emaw; Short Term Stay-a rawn lut te rawn thlen ni atanga ni 7 chhung emaw a nung ang. Ni 7 a ral hma a Regular ILP an lak loh chuan an haw leh ngei ngei tur a ni.
Mizorama COVID-19 hri leng a darh zel loh nan Mizorama rawn lut tur te fimkhur taka chhinchhiah an ngaih avangin mPASS Flight hi ILP Sponsor tu, Mizoram khua leh tui dik tak chauhin a mi chhawr tur te tan a dil tur a ni. Mamawh tak tak ah chauh dil tur a ni a, dilna te hi Home Department in uluk takin a endik thin a ni.
ISSUED BY HOME DEPARTMENT, GOVERNMENT OF MIZORAM
