Vawiin 28.12.2020 (Thawhtanni) khan Home Minister zahawm tak Pu Lalchamliana ho in kumin Krismas vuakveta dan leh thupek kenkawh dan thlir ho a ni a, Kumthar vuakveta halpuah leh halmawi khap tawh khauh taka kenkawh dan tur an rel.
He sawihona ah hian Chief Secretary, Home Secretary, Additional DGP leh Mizoram Police hotute, Aizawl DC, Aizawl City Local Council Association hruaitute bakah CYMA OB te an tel a ni.
COVID-19 hri leng mek avangin boruak tihbawlhhlawh in thil pawi zawk a thlen thei a, hei vang hian kum dang zawng aiin halpuah leh halmawi hal khapna khauh lehzuala kenkawh ni se tih a ni. Tin, Sky-lantern ten kangmei a tihchhuah theih bakah power supply a tihkhaihlak thin avangin, Sky-lantern hi zawrh leh hal khap a ni bawk.
District tin Magistrate ten CrPc Section 144 hnuaiah halpuah leh halmawi chi hrang hrang te khapna thupek an chhuah tawh angin he khapna thupek bawhchhia te chu IPC 188 hnuaiah mihring himna leh hriselna a tihderthawn theih avangin thla 6 thleng lung in tan tir emaw, cheng sangkhat thleng chawi tir emaw, a kawpa lung in tan leh pawisa chawi tir theih an nih anga ngaihhnathiamna awm lova hremna kenkawh nei ni se tih rel a ni. Halpuah leh halmawi hal tu te bakah an halna hmun / in nei tu te thlengin hrem an nih theihna turin hma a la ang.
General Administration Department (GAD), Government of Mizoram in a lo tihchhuah tawh angin Sawrkar hnathawk te chu a bik takin halpuah leh halmawi te hi hal lo tura hraittir tawh an nih angin an zawm ngei tur a ni a.
Kumthar vuakvetah mipui himna atan Police duty te indahbelh a ni dawn a, Magistrate duty pawh ruat belh a ni ang. Halpuah, halmawi, Sky-lantern hal tu te hrem ngei an nih theih nan hmalak a ni dawn a, Mizoram mipui zawng zawng te he ngenna hi ngaipawimawh tura chah nawn an ni.
Issued by Home Department, Government of Mizoram
